پنجاب میں گوگل کروم بُک فیکٹری لگانے کی پیشکش پر وزیراعلیٰ مریم نواز نے بھرپور معاونت کی یقین دہانی کرا دی۔اے آر وائی نیوز کے مطابق آج وزیراعلیٰ مریم نواز سے گوگل فار ایجوکیشن اور ٹیک ویلی کے اعلیٰ سطح وفد نے ملاقات کی۔ وفد کی سربراہی گوگل فار ایجوکیشن کے گلوبل ڈائریکٹر کیون کالیس نے کی، ٹیک ویلی کے سی آئی او عمر فاروق بھی موجود تھے۔ اس موقع پر پنجاب میں گوگل کروم بُک فیکٹری لگانے کی پیشکش کی۔ وزیراعلیٰ نے بھرپور معاونت کی یقین دہانی کرا دی۔
وفد نے وزیراعلیٰ کو بتایا کہ گوگل کروم بُک میں تین بڑے اور اہم سافٹ ویئر بھی انسٹال کیے جائیں گے۔ طلبہ کے لیے آرٹیفیشل انٹیلی جنس ٹول کیٹ اور”اے آئی جیمنی“ انسٹال کیا جائے گا۔ انگلش لرننگ کے لیے” ریڈ آلانگ” سافٹ ویئر بھی گوگل کروم بک میں میسر ہوگا جب کہ گوگل کروم بُک میں "کین وا” سافٹ ویئر بھی مہیا کیا جائے گا۔ملاقات میں گوگل فار ایجوکیشن کے وفد نے وزیراعلیٰ مریم نواز شریف کے ویژنری قیادت کو سراہا اور تعلیم بالخصوص بچیوں کو آئی ٹی کی جدید ٹیکنالوجی تعلیم کے لیے ان کے کے ویژن کو متاثر کن قرار دیا۔
اس موقع پر گوگل فار ایجوکیشن کے اعلیٰ سطح وفد نے وزیراعلیٰ کو بریفنگ دیتے ہوئے بتایا کہ گوگل فارایجوکیشن نے پنجاب میں سرکاری اسکولوں کے 2 ہزار سے زائد ٹیچرز کو ٹریننگ دی، دیگر اساتذہ کو بھی آئی ٹی ٹریننگ دی جائے گی جب کہ سرکاری اسکولوں کے طلبہ کی آئی ٹی ٹریننگ پر بھی کام کیا جا رہا ہے۔وزیراعلیٰ نے پنجاب میں آئی ٹی اور تعلیم کے فروغ کے لیے گوگل فار ایجوکیشن کی معاونت کو سراہا اور کہا کہ حکومت صوبے میں آئی ٹی کو بنیادی تعلیم کا حصہ بنانے پر کام کر رہی ہے۔ پنجاب کو آرٹیفیشل انٹیلیجنس حب بنانا ہمارا عزم ہے۔
