عالمی شہرت یافتہ فٹبالر کرسٹیانو رونالڈو اور ان کی اہلیہ جارجینا روڈریگز نے سعودی عرب کے ریڈ سی ریزورٹ میں دو شاندار ولاز خرید لیے ہیں۔تفصیلات کے مطابق یہ ولاز رِٹز کارلٹن ریزرو ریزیڈنس کا حصہ ہیں اور دنیا کی سب سے خصوصی جزیرہ نما رہائش گاہوں میں شمار کیے جاتے ہیں۔
ریڈ سی گلوبل (آر ایس جی) کے مطابق یہ 19 انتہائی نجی ولاز صاف سفید ساحل اور شفاف پانیوں کے درمیان واقع ہیں اور صرف چارٹر بوٹ یا آبی جہاز کے ذریعے ان پر پہنچا جا سکتا ہے۔ رونالڈو نے اس مقام کو ’’واقعی شاندار‘‘ قرار دیتے ہوئے کہا کہ وہ اور جورجینا اس کے قدرتی حسن اور سکون سے فوراً متاثر ہوئے۔
خریدی گئی دو ولاز میں ایک تین بیڈروم کا گھر خاندانی وقت کے لیے جبکہ دوسرا دو بیڈروم کا ولا نجی قیام کے لیے مختص ہے۔یہ منصوبہ سعودی وژن 2030 کا حصہ ہے، جس کا مقصد لگژری سیاحت کو پائیداری کے اصولوں کے ساتھ فروغ دینا اور 2040 تک مقامی ماحولیاتی نظام کو 30 فیصد تحفظ فراہم کرنا ہے۔
