متحدہ عرب امارات کی ایمریٹس ایئرلائن نے اسٹوڈنٹس کو کرایوں میں کمی اور اضافی سامان لے جانے کی سہولت پیش کردی ہے۔ میڈیا کے مطابق ایمریٹس ایئرلائن میں طلباء کو اکانومی کلاس کے کرایوں پر 10 فیصد تک رعایت اور پروازیں تبدیل کرنے کی سہولت بھی حاصل ہوگی، 16 تا 31 سال کی عمر کے طلباء ایمریٹس اکانومی کلاس کے کرایوں پر 10 فیصد تک کی رعایت حاصل کرسکیں گے۔طلباء کو پروازیں تبدیل کرنے کی سہولت بھی حاصل کرسکیں گے۔ ایئرلائن کی اس پیشکش کا اطلاق 140 سے زیادہ مقامات پر تعلیم یا چھٹیوں کیلئے سفر کرنے والے طلباء پر لاگو ہوگا، ایسے طلباء کیلئے پروموشنل کوڈ STUDENT کا استعمال کرکے 31 مارچ 2027 تک کی گئی بکنگ شامل ہوتی ہے۔
پیشکش کے تحت اکانومی کلاس کے طلباء مسافر 10فیصد تک جبکہ پریمیم اکانومی اور بزنس کلاس کے مسافر اہل کرایوں میں 5فیصد تک کی بچت کرسکتے ہیں۔دوسری جانب اماراتی نیوز ایجنسی وام کے مطابق ایمریٹس نے باضابطہ طور پر Crypto.com Pay™ متعارف کرا دیا ہے، جس کے ذریعے صارفین ایئرلائن کی ویب سائٹ اور ایپ پر ڈیجیٹل ادائیگی کر سکیں گے۔Crypto.com اکاؤنٹ رکھنے والے صارفین اب emirates.com اور Emirates App پر ٹکٹ بک کرتے وقت ادائیگی کے مرحلے میں Crypto.com Pay™ کا انتخاب کر سکتے ہیں۔ ادائیگی محفوظ طریقے سے اور متحدہ عرب امارات کے ریگولیٹری معیارات کے مطابق مکمل کی جائے گی۔
یہ سہولت متحدہ عرب امارات کے اہل رہائشیوں کے لیے ان بکنگز پر دستیاب ہے جن کی قیمت اور ادائیگی اماراتی درہم (AED) میں ہو۔یہ پیش رفت Crypto.com اور ایمریٹس کے درمیان جولائی 2025 میں ہونے والے اس شراکتی معاہدے پر عمل درآمد کا حصہ ہے، جس کے تحت Crypto.com Pay™ کو ایئرلائن کے ڈیجیٹل ادائیگی نظام میں شامل کرنے کےامکانات کا جائزہ لینے کے لیے مفاہمتی یادداشت پر دستخط کیے گئے تھے۔ایمریٹس کےنائب صدر اور چیف کمرشل آفیسر عدنان کاظم نے کہا کہ اس اقدام پر عمل درآمد ہمارے اس عزم کی تکمیل ہے کہ ہم اپنے صارفین کو سفر کی ادائیگی کے مزید اختیارات فراہم کریں۔
یہ اس نئی، ڈیجیٹل ٹیکنالوجی سے واقف نسل کی تیزی سے بدلتی ترجیحات کی بھی عکاسی کرتا ہے، جو اپنی مالیات کا انتظام اور سفری منصوبہ بندی بنیادی طور پر موبائل فون کے ذریعے کرتی ہے اور توقع رکھتی ہے کہ ایئرلائنز بھی اسی رفتار سے آگے بڑھیں۔انہوں نے کہاکہ صرف ایک سال میں معاہدے سے آغاز تک پہنچنا دونوں اداروں کی ٹیموں کی کاوشوں اور ایسے ریگولیٹری ماحول کا ثبوت ہے جس نے اس نوعیت کی جدت کو ممکن بنایا، جو متحدہ عرب امارات اور دبئی کے فن ٹیک اور ڈیجیٹل معیشت میں قائدانہ کردار کے عزم کی عکاسی کرتا ہے۔Crypto.com کے صدر اور چیف آپریٹنگ آفیسر ایرک انزیانی نے کہا کہ ایمریٹس کے ساتھ شراکت داری Crypto.com اور ہماری Pay سروس کے لیے ایک اہم سنگ میل ہے، جو آسان استعمال اور موثر انضمام کے لیے معروف ہے۔
یہ تعاون جدت کے حوالے سے متحدہ عرب امارات کے مستقبل بین نقطہ نظر کا مظہر ہے اور ہمیں خوشی ہے کہ ہم ایمریٹس کی ڈیجیٹل ادائیگیوں کے شعبے میں پیش رفت کا حصہ بن رہے ہیں۔یہ انضمام Crypto.com کی دبئی میں قائم کمپنی کے ذریعے کیا گیا ہے، جو متحدہ عرب امارات کے مرکزی بینک سے Stored Value Facilities (SVF) لائسنس حاصل کرنے والی پہلی Virtual Asset Service Provider (VASP) ہے اور SVF فریم ورک کے تحت کام کرتی ہے۔بکنگ کے دوران ادائیگی کے مرحلے پر Crypto.com Pay™ بطور ادائیگی آپشن emirates.com اور Emirates App پر دستیاب ہوگا۔
موبائل پر Emirates App کے ذریعے بکنگ کرنے والے صارفین کو ادائیگی مکمل کرنے کے لیے Crypto.com ایپ پر بھیجا جائے گا، جہاں وہ اپنے والیٹ سے ادائیگی کریں گے، جس کے بعد انہیں دوبارہ Emirates App پر واپس لایا جائے گا، جہاں انہیں بکنگ کی تصدیق اور ای ٹکٹ موصول ہوگا۔ڈیسک ٹاپ پر emirates.com پر بکنگ کرنے والے صارفین ادائیگی کے مرحلے پر Crypto.com Pay™ منتخب کریں گے، پھر بکنگ صفحے پر موجود کیو آر کوڈ سکین کر کے اپنی Crypto.com ایپ میں ادائیگی کی منظوری دیں گے۔
ادائیگی کی منظوری کے بعد ان کی سکرین پر بکنگ کی تصدیق اور ای ٹکٹ جاری کر دیا جائے گا۔یہ اقدام D33 اکنامک ایجنڈا کے تحت دبئی کیش لیس سٹریٹجی کی حمایت کرتا ہے، جس کا مقصد 2026 کے اختتام تک سرکاری اور نجی شعبوں میں ہونے والے 90 فیصد مالی لین دین کو ڈیجیٹل بنانا ہے۔یہ گزشتہ سال دبئی فنانس کے ساتھ ڈیجیٹل ادائیگیوں کے فروغ کے لیے ہونے والی ایمریٹس کی شراکت داری پر بھی استوار ہے، جبکہ Crypto.com نے بھی سرکاری خدمات کی ادائیگی کے لیے ڈیجیٹل ادائیگیوں کی سہولت فراہم کرنے کے سلسلے میں دبئی فنانس کے ساتھ شراکت داری کی ہے۔
