پنجاب میں پیدائش، وفات اور شادی کے سرٹیفکیٹس کے اجرا کا طریقہ کار جدید بنانے کیلئے بائیومیٹرک نظام متعارف کرا دیا گیا۔نئے نظام کے تحت نادرا ڈیٹا بیس سے بائیومیٹرک تصدیق کی جائے گی جس کا مقصد جعلی اندراجات اور بوگس سرٹیفکیٹس کی روک تھام اور دستاویزات کے اجرا میں شفافیت یقینی بنانا ہے۔۔ یہ نظام محکمہ بلدیات پنجاب اور نادرا کے باہمی اشتراک سے متعارف کرایا گیا ہے، جس کے تحت پیدائش، وفات اور شادی کے سرٹیفکیٹس کے اجرا کیلئے بائیومیٹرک تصدیق لازمی قرار دی گئی ہے۔
تقریب سے خطاب کرتے ہوئے صوبائی وزیر بلدیات ذیشان رفیق نے کہا کہ نئے نظام سے جعلی اندراجات کی روک تھام اور مستند دستاویزات کے اجرا کو یقینی بنانے میں مدد ملے گی، شہریوں کو سفارش اور رشوت کے بغیر بروقت خدمات فراہم کرنا اس اقدام کا بنیادی مقصد ہے۔ ذیشان رفیق نے مزید کہا کہ ڈیجیٹل پنجاب ویژن کے تحت بائیومیٹرک نظام کو مرحلہ وار فیصل آباد سمیت صوبے بھر کی تمام یونین کونسلز تک توسیع دی جائے گی، تاکہ بلدیاتی خدمات کو جدید، شفاف اور عوام کیلئے آسان بنایا جا سکے۔
